Ne l die binte i seis de Janeiro, nós, ls alunos de l 4ºanho, fazimos ua bejita al Museu de la Tierra de Miranda.Tubimos la cumpanha de ls porsores Vasco i Duarte que fúrun cun nós i mos falórun de las figuras i de alguns de ls rituales de l solestício de eimbierno na Tierra de Miranda.

L Museu de la Tierra de Miranda ten solo ua sala dedicada a este assunto. Sendo assi, bimos alguas destas figuras que mos parecírun mui angraçadas i un tanto ralas a la purmeira bista. Stában alhá las figuras de l Chocalheiro ou l Bielho de Bal Porco, l Chocalheiro de Bempuosta, l Farandulo de Tó, la Bielha de Bila Chana de la Bracenosa i l Carocho i la Bielha de Costantin. Uas figuras lhebában máçcara, outras solo tenien la cara tiçnada, mas todas ousában uas roupas que tenien un significado própio i solo ls homes ou ls rapazes se podien maçcarar.

Sun questumes i tradiçones mui antigas, que yá benírun de hai muito tiempo i que apesar de habéren sido proibidas pula eigreija, cuntinórun-se a mantener i até fázen l peditório pa las fiestas ou pa la eigreija.

La bejita fui mui anteressante i gustou-mos muito. Fai-mos bien daprender a coincer melhor nas tradiçones i ls usos de la nuossa tierra.

Alunos de Lhéngua i Cultura Mirandesa de la E.B.1 de Miranda de l Douro

 

 

 
   
   
publicado por mirandaeb1 às 18:32